Яңалыклар


21.11.2017 Рөстәм Миңнеханов: Бөтендөнья ислам икътисадый форумы һәм KazanSummit берсе өчен берсе файдалы булыр иде
Пленар утырыш тәмамлангач, чарада катнашучылар 13 нче Бөтендөнья ислам икътисадый форумы күргәзмәсенә юнәлделәр. Биредә ТР Инвестицион үсеш агентлыгы Татарстанның сәнәгать кластеры һәм инфраструктурасын тәкъдим итүче стенды бар иде. Аерым интерактив экран Казанда 2018 елның 10-12 май көннәрендә узачак "Россия – Ислам дөньясы: KazanSummit" унынчы халыкара икътисадый форумы турында мәгълүматны күрсәтеп торды.  Малайзия Премьер-министры Наджиб Абдул Разакка Татарстан стенды турында Рөстәм Миңнеханов аңлатмалар биреп барды һәм республиканың социаль-икътисадый вәзгыяте турында сөйләде. Очрашуда Малайзия Премьер-министры Татарстанның суднолар төзү һәм вертолетлар җитештерү мөмкинлекләре белән кызыксынды.  Татарстан Президенты форум кысаларында берничә эшлекле очрашу үткәрде. 
20.11.2017 Татарстан Президенты Малайзиядә Бөтендөнья ислам икътисадый форумында катнашачак
Бүген Татарстан Республикасы Президенты Рөстәм Миңнеханов Малайзиягә эш сәфәре белән килде. Кучинга шәһәре аэропортында Рөстәм Миңнехановны Малайзиянең Саравак штаты Транспорт министры Җериб Сусил һәм Россия Федерациясенең Малайзиядәге Гадәттән тыш һәм Тулы вәкаләтле Илчесе Валерий Ермолов каршы алды.   Иртәгә Кучинг шәһәрендә Рөстәм Миңнеханов 13 нче Бөтендөнья ислам икътисадый форумында катнашачак һәм пленар утырышта чыгыш ясаячак. Моннан тыш, Татарстан Республикасы Президентының эш графигында берничә рәсми сөйләшү планлаштырылган, шул исәптән ул Малайзия Премьер-министры Нәҗиб Разак белән, Саравак штаты Губернаторы Абдул Тайб бин Мәхмүд һәм Саравак штатының Баш министры Абдул Рахман Җохари Опенг белән, Бөтендөнья ислам икътисадый форумы фонды җитәкчелеге Муса Хитам һәм башкалар белән очрашачак.
18.11.2017 Татарстанның Түбән Кама һәм Кукмара районнары Кытай провинцияләре белән хезмәттәшлекне үстерәчәк
Бүген Татарстан Республикасы Президенты Рөстәм Миңнехановның Кытай Халык Республикасына эш сәфәре кысаларында Түбән Кама муниципаль районының Түбән Кама шәһәре белән Сычуань провинциясенең Мэйшань шәһәре арасында Хезмәттәшлек турында килешү һәм Кукмара муниципаль районының Кукмара шәһәре белән Чжэцзян провинциясенең Юйхуань шәһәре арасында Хезмәттәшлек турында меморандум имзаланды. Документлар Рөстәм Миңнехановның Сычуань провинциясенең Мэйшань шәһәре мэры Ло Цзямин белән һәм Чжэцзян провинциясенең Юйхуань шәһәре мэры У Цайпин белән очрашу барышында имзаланды. Татарстан Республикасы ягыннан документка Түбән Кама муниципаль районы һәм Түбән Кама шәһәре башлыгы Айдар Метшин һәм Кукмара муниципаль районының Кукмара шәһәре башлыгы Сергей Димитриев кул куйды.
17.11.2017 Татарстан Республикасы Президенты Шэньчжэньга килде
Бүген Татарстан Республикасы Президенты Рөстәм Миңнеханов Кытай Халык Республикасына эш сәфәре кысаларында Шэньчжэнь шәһәренә килде. Биредә ул Кытай югары технологияләр күргәзмәсен карый һәм берничә эшлекле очрашу үткәрә. Татарстан Республикасы делегациясе составында ТР Премьер-министры урынбасары - мәгълүматлаштыру һәм элемтә министры Роман Шәйхетдинов, ТР Иминлек Советы секретаре Айрат Шәфигуллин, ТР Президенты ярдәмчеләре Радик Гыйматдинов,  Альберт Нафигин һәм Роберт Миңнегалиев, ТР икътисад министры Артем Здунов, ТР Инвестицион үсеш агентлыгы җитәкчесе Талия Миңнуллина, ТР Түбән Кама муниципаль районы башлыгы Айдар Метшин, ТР Кукмара муниципаль районы башлыгы Сергей Дмитриев, "АК БАРС" ГАҖ идарәсе рәисе Зөфәр Гәрәев һәм башка рәсми затлар бар. 
15.11.2017 Рөстәм Миңнеханов Казандагы "Green" торак комплексына беренче ташны салды
Татарстан Президенты Рөстәм Миңнеханов һәм  Финляндиянең Россиядәге Гадәттән тыш һәм Тулы вәкаләтле Илчесе Микко Хаутала Казанның Совет районында тантаналы төстә Green торак комплексына беренче ташны салуда катнашты. Яңа торак комплексы YIT — “ЮИТ Казан” фин төзелеш компаниясенең бүлендек структурасы көчләре белән салыначак. Проектка фаразланган инвестиция күләме - 3 млрд сум. Районның Зирекле урамында төрле биеклектәге 44,6 мең квадрат метрда 1041 фатирлы 6 йорт төзү планлаштырыла. Төзелеш объектын 2019 елның III кварталында тәмамлау күзаллана. Төзелеш өчен җаваплы оешмасы планнары буенча, Green торак комплексы составына, торак йортлардан тыш, паркинглар белән кибетләр һәм офис биналары, 140 урынга балалар бакчасы, зур балалар мәйданчыгы һәм төзекләндерелгән яр буе керәчәк. Эш уңышлы барган очракта, торак комплексы янәшәсендә мәктәп һәм тагын бер балалар бакчасы булдыру планлаштырыла.